Rama: Korrupsioni rëndon mbi qeverinë Berisha

Rama: Do të kontribuojmë në të gjitha reformat e masat e nevojshme në luftën kundër korrupsionit në vend

Tiranë- Kreu i Partisë Socialiste të Shqipërisë Edi Rama ka folur dje në lidhje me raportin e publikuar dy ditë më parë për korrupsionin në Shqipëri. Sipas liderit socialist alarmi për nivelin e korrupsionit gjithnjë në rritje në vendin tonë, është edhe më i tmerrshëm kur vjen nga një përfaqësues i lartë në Shqipëri, siç është Ambasadori i Shteteve të Bashkuara të Amerikës, John Ëithers. Pavarësisht gjendjes së tmerrshme të nivelit të korrupsionit në vendin tonë, kreu socialist ka siguruar të gjithë se partia që ai drejton do të kontribuojë në të gjitha reformat e masat e nevojshme në luftën kundër korrupsionit në vend poshtë, deklarata e plotë e liderit socialist lidhur me raportin e fundit të korrupsionit në Shqipërisë, bërë publik dy ditë më parë.

 Edi Rama:  

 Dua të përshëndes e falënderoj publikisht përfaqësuesin e Shteteve të Bashkuara në Shqipëri, ambasadorin John Ëithers, për gjithçka tha dje mbi gjendjen e korrupsionit në vendin tonë, shkaqet e përkeqësimit të kësaj plage, pasojat dhe masat që duhen marrë.

Ndoshta asgjë nga ato që tregon studimi i komentuar prej ambasadorit Ëithers nuk është e re për ne, që e kemi thënë vijimësisht se në Shqipëri korrupsioni nuk po luftohet dhe se në shumë aspekte ai po hyn më thellë në damarët e shtetit e po rëndon më shumë në kurriz të vendit e të qytetarëve shqiptarë.

Por e thënë prej dikujt që nuk është palë në skenën politike dhe që përfaqëson këtu aleatin e madh strategjik të shqiptarëve në përpjekjen për demokratizimin, modernizimin e integrimin e Shqipërisë në Botën e Lirë, kjo e vërtetë shumë shqetësuese merr peshë të veçantë.

Ne jemi absolutisht dakord me pikëpamjen se e gjithë klasa politike duhet të bëjë shumë më tepër në luftën kundër korrupsionit dhe jemi të gatshëm të kontribuojmë për të gjitha reformat e masat e nevojshme, në nivelin kushtetues e ligjor, po edhe në atë etik ku politika shqiptare jep një shembull të patolerueshëm me gjuhën, sjelljen e veprimet e shumëkujt ndër përfaqësuesit e saj.

Por ritheksojmë se përgjegjësia kryesore për këtë rritje të rrezikshme galopante të ndikimit të korrupsionit në sjelljen e shtetit ndaj qytetarit i takon atyre që qeverisin dhe rinënvizojmë se kryeministri Sali Berisha dhe qeveria e tij e kanë mbështetur direkt dhe indirekt korrupsionin, duke u betuar me fjalë kundër tij e duke u bërë, me vepra të dënueshme e mosveprime të pajustifikueshme, sponsori i tij gjeneral.

Nën këtë qeveri kanë ndodhur ngjarjet më të rënda me motiv korrupsionin, nga grabitja e fondeve të rrugës Durrës – Kukës, ku në emër të patriotizmit ka ikur në drejtim të paditur një fond i barabartë me shumën e nevojshme për të ndërtuar edhe Rrugën e Arbërit, tek ndërhyrja e paligjshme për ndryshimin e kushteve të tenderit të kartave të identitetit në mes të garës, ku nuk cënohet vetëm xhepi i shqiptarëve po kërcënohet edhe e drejta e votës, dhe deri tek shpërthimi vullkanik i gangrenës së Gërdecit, ku korrupsioni mori jetë njerëzish, shkatërroi shtëpi, prona e pasuri, rrënoi shpresën e ardhmërinë e mijëra familjeve të ndershme.

Nën këtë qeveri një njeri i arrestuar vazhdon të drejtojë sistemin e tatimeve të republikës, gjë që nuk tregon se Sali Berisha respekton të drejtën e prezumimit të pafajësisë, po se kryeministri ynë është simboli i një politike të vjetër të fjalëve të ndara nga veprat, të interesave personale e klanore, të paaftësisë e të dështimeve sistematike.

Nën këtë qeveri ka humbur shpresa, ka marrë revan varfëria e papunësia, është dhjetrafishuar kostoja e jetesës  dhe është bërë i papërfillshëm çmimi i jetës.

Kësaj qeverie të dalë nga politika e vjetër e dasive artificiale për të garantuar pushtetin e një klani ne do t'i japim fund me një bashkim të ri, përtej kufijve të vjetër të partive, me çdo shqiptar e shqiptare, socialistë e demokratë të ndershëm, të cilët duan një Shqipëri të punës së ndershme e të politikës së re në luftë me varfërinë, papunësinë, injorancën, dhunën, korrupsionin.