Gazetarët shqiptarë: Berisha na ka shpallur luftë se u rreshtuam në anën e viktimës

TIRANE- Mediat kanë reaguar ndaj sulmeve të Berishës ndaj mediave  Dhjetëra gazetarë kanë hartuar një deklaratë sipas të cilave, Berisha ka tejkaluar çdo standard njerëzor duke poshtëruar vdekjen tragjike të presidentit të Top-Medias, Dritan Hoxha. Nëpërmjet kësaj deklarate, gazetarët shprehen se nuk jemi ne ata që fshehin krimet dhe se shkaku që Berisha shpall lufte është sepse mediat zbulojnë krimet. Nëpërmjet kësaj deklarate, gazetarët shprehen të shqetësuar nga fushata denigruese e kryeministrit Berisha ndërkohë që u bëhet thirrje ndërkombëtarëve që të mbrojnë lirinë e fjalës nga ata që mbrojnë krimet dhe që janë në pushtet. 

Deklaratë në emër të gazetarëve shqiptarë 

Kryeministri i Shqipërisë Sali Berisha, kohët e fundit po udhëheq një fushatë denigruese ndaj medias shqiptare, duke tejkaluar gjithë standardet etike, politike dhe njerëzore deri tek përpjekjet e fundit për të poshtëruar vdekjen tragjike të një prej krijuesve më të suksesshëm në historinë e medias shqiptare Presidentit të Top Channel, Dritan Hoxhës.

Me një vetëdije të plotë ai shfaqi cinizmin e tij disa orë pas vdekjes së zotit Dritan Hoxha dhe më pas përdori gjithë mekanizmat e tij politike dhe mediatike që ka nën kontroll për të mbajtur gjallë këtë cinizëm. Në një fushatë të paprinciptë ai po përpiqet të penalizojë median për një akt që nuk e ka kryer dhe të shpikë një fshehje krimi që media nuk e ka bërë. Ne pranojmë pa asnjë kompleks se në rastin e pasqyrimit të vdekjes së Dritan Hoxhës, mediat shqiptare vunë solidaritetin njerëzor para angazhimit profesional.

Ne gazetarët shqiptarë nuk kemi fshehur asnjë krim dhe nuk mund të ndjehemi fajtorë për një gjë që s’e kemi bërë. Ata që kanë fshehur krime shtetërore në këtë vend janë në pushtet dhe po përpiqen të shpëtojnë autorët. Ne gazetarët shqiptarë po përpiqemi t’i zbardhim këto krime. Për këtë arsye kryeministri na ka shpallur luftë. Ne gazetarët e shtypit shqiptar jemi të shqetësuar nga instrumentalizimi i institucionit të Partisë Demokratike si partia kryesore në vend për t’u përdorur në një fushatë denigruese ndaj medias shqiptare dhe vdekjes së një prej emrave të njohur të saj, për shkak të mllefeve personale të kryetarit të kësaj partie Sali Berisha. Ai po përdor në mënyrë barbare vdekjen e një vajze, duke shkelur privatësinë e saj, vetëm për të demonstruar urrejtjen e tij. Ne u rreshtuam në anën e viktimës dhe për këtë kryeministri na ka shpallur luftë.

Ne gazetarët e shtypit shqiptar jemi të shqetësuar nga fryma e denigrimit dhe fushata e fyerjeve që kryeministri Sali Berisha ka nisur prej kohësh ndaj komunitetit të gazetarëve shqiptare, madje dhe ndaj atyre të huaj siç qe rasti i gazetës “ New York Times” , për shkak të qëndrimit të tyre kritik ndaj qeverise që ai drejton. Ne u rreshtuam në mbrojtje të kolegëve tanë dhe për këtë arsye kryeministri na ka shpallur luftë. Ne gazetarët e shtypit shqiptar i bëjmë thirrje botuesve shqiptarë, drejtuesve profesioniste të medias shqiptare dhe institucioneve ndërkombëtare që mbrojnë lirinë e medias, ta shënojnë këtë fakt si një akt të rëndë kundër lirisë së shtypit të udhëhequr nga kryeministri i vendit Sali Berisha tek i cili janë zgjuar atavizmat më të errëta të historisë së tij problematike me shtypin shqiptar. Ne gazetaret e shtypit shqiptar jemi te angazhuar ta perballojme kete beteje, me te, si një detyrim moral, profesional dhe njerëzor që keni ndaj lexuesve tanë dhe lirisë së shtypit në Shqipëri. 

Kjo deklarate u firmos nga: 

Alba Malltezi

Armand Shkullaku,

Ylli Rakipi

Andi Bushati

Skënder Minxhozi

Ilir Babaramo

Anila Basha

Denis Minga

Mero Baze

Altin Kreka

Rudina Xhunga

Mustafa Nano

Arban Hasani

Sokol Balla

Filip Cakuli

Enton Abilekaj

Henri Çili

Eni Vasili

Rezar Xhaxhiu

Sokol Shameti

Franko Egro

Martin Leka

Alfred Peza

Pandi Gjata

Valbona Kurti

Artan Hoxha

Aleksandër Cipa

Mentor Kikia

Bledar Zaganjori

Alban Dudushi

Mentor Nazarko