Gjykata Kushtetuese rrëzon kërkesën e Sollakut për dekretin e shkarkimit: Kuvendi nuk mund të hyjë në kompetencat e Prokurorisë

Tiranë- Gjykata Kushtetuese ka marrë vendim dje duke rrëzuar kërkesën e ish kryeprokurorit Theodhori Sollaku për shfuqizimin e dekretit për shkarkimin e tij. “Kërkesa e kryeprokurorit

Tiranë- Gjykata Kushtetuese ka marrë vendim dje duke rrëzuar kërkesën e ish kryeprokurorit Theodhori Sollaku për shfuqizimin e dekretit për shkarkimin e tij. “Kërkesa e kryeprokurorit për këtë vendim është e pabazuar” ka qenë deklarata e Gjykatës Kushtetuese. Kjo e fundit ka dhënë dje vendimin edhe për një kërkesë tjetër të ish numrit një të organit të akuzës, për zgjidhjen e mosmarrëveshjes së kompetencës mes Prokurorisë së Përgjithshme dhe Kuvendit. “Kuvendi i Shqipërisë nuk ka kompetencë të kontrollojë dhe të vlerësoje vendimet e prokurorëve në çështjet konkrete për mosfillimin e procedimit penal, për pezullimin e hetimeve, për pushimin e çështjeve penale, për marrjen e masave të sigurimit, si dhe të vendimeve e veprimeve të tjera të prokurorëve që lidhen me ushtrimin e ndjekjes penale dhe përfaqësimin e akuzës në gjyq", thuhet në njoftimin për shtyp të Gjykatës. Në njërën kërkesë ish Prokurori i Përgjithshëm, Theodhori Sollaku kërkonte shfuqizimin e Dekretit nr. 5523, datë 22.11.2007, të Presidentit të Republikës si dhe të Vendimit nr. 141, datë 05.11.2007 të Kuvendit të Shqipërisë, që bëjnë fjalë për shkarkimin e tij nga detyra e Prokurorit të Përgjithshëm. Kushtetuesja arsyetoi se këto akte nuk përmbajnë shkelje të të drejtave kushtetuese.

Lidhur me kërkesën tjetër, me objekt zgjidhjen e mosmarrëveshjes së kompetencës ndërmjet Prokurorisë së Përgjithshme dhe Kuvendit të Republikës së Shqipërisë, Gjykata Kushtetuese vendosi që Kuvendi nuk mund të marrë kompetencat e organit të akuzës.