Me eprorë si Saliu dhe Mediu, nuk mund të funksionojnë normalisht F.A.

Nga Pirro Lutaj  

Tashmë opinioni ka në dispozicion shumë informacion lidhur me ngjarjen kriminale të Gërdecit. Është shumë e qartë se  organizimi i demontimit të armatimit  luftarak ngjitur me autostradën kryesore të vendit dhe vetëm 15 km larg kryeqytetit të Shqipërisë, nuk ka patur si qëllim “plotësimin e standardeve për të marrë ftesën për anëtarësim në NATO” siç kërkojnë dhe e paraqesin atë dyshja Berisha-Mediu, por një qëllim krejt tjetër, atë të korrupsionit  dhe krimit të organizuar, pasojat e të cilit për hapësirën shqiptare do të kujtohen siç kujtohet ne Botë shpërthimi në Hiroshima.

Mbrojtja e Fatmir Mediut në Këshillin për rregulloren dhe imunitetet nuk tregoi asnjë shenjë të pafajësisë së tij, përveç se evidentoi gjithë personat ushtarakë që kishin dijeni për ngjarjen në Gërdec, a thua se ish Ministri nuk e kupton që përgjegjësinë kryesore për një krim e kanë autoret e krimit dhe jo ata që kanë dijeni për të.

Natyrisht nuk duhet të shmanget nga përgjegjësia asnjë person që ka edhe 1 % lidhje me ngjarjen e rëndë të Gërdecit, qoftë ky ushtar apo gjeneral, por në bazë të dokumentave që janë shpërndarë dhe mund t’i gjesh në  çdo cep të Tiranës. Autorët e ngjarjes së rendë të Gërdecit, rezultojnë Kryeministri, Ministri Mbrojtjes, Delijorgji i cili u bë “bos” me paret e përziera me 26 jetët e pafajshme.

Ju kërkoj falje familjarëve dhe të afërmeve të  atyre që kanë humbur jetën ose janë plagosur në këtë krim të rëndë shtetëror, që po detyrohem t’ju lëndoj plagën e madhe që u shkaktoi atyre qeveria e Saliut.

Duke bërë një analizë të  hollësishme të të gjitha materialeve dhe dokumentave që kanë firmosur e vulosur dyshja Berisha-Mediu, e posaçërisht VKM Nr.138 datë 14.3.2007 dhe Urdhri I MM Nr. 2044 dhe 7.12.2007 rezulton se FA kanë patur dy detyra;

1. Të bëjnë transportimin dhe dorëzimin e municionit tek objekti i kontraktuar nga ndërmarrja MEICO.
2. Të bëjnë ruajtjen nga jashtë të objektit.

Është e qartë për të gjithë se ngjarja nuk ndodhi as gjatë transportit e dorëzimit dhe as në rrethimin e jashtëm të objektit, por mu në zemër të procesit të demontimit që kryhej nën përgjegjësinë e Ministrit të Mbrojtjes dhe strukturave vartëse të tij dhe kontraktori privat.

Pra e thënë shkurt, autorët e kësaj ngjarjeje tragjike janë tashmë të ekspozuar qartësisht. Ata fillojnë nga Kryeministri i Shqipërisë nëpërmjet VKM Nr.136, dhe vazhdojnë me Urdhrat e përpiluara nga Delijorgji në interes të biznesit të tij vrastar të firmosura nga ish Ministri i Mbrojtjes.

Jam i bindur se Prokuroria e ka mjaft të thjeshtë ta dokumentojë këtë veprimtari kriminale dhe të përcaktojë shkaktarët, prandaj le ta lemë atë një sahat e më parë të lirë për të vepruar.

Qëndrimet tuaja z. Kryetare lidhur me veprimet e Prokurorisë për këtë ngjarje, tregojnë qartë se në Shqipërinë tonë, vetëm koncepti i ndarjes së pushteteve nuk ekziston.

Askush nuk mund ta kuptojë qëndrimin tuaj zonja Topalli që kërkoni të merrni mbi vete misionin e pamundur të fshehjes së krimit. Mediu dhe ustallarët e shtetkapjes nuk e kanë të lehtë këtë herë. Ata nuk i ndihmoni dot as ju dhe as alternativa e shpërndarjes së fajit duke ju referuar F.A. apo  institucioneve të tjera të Sigurisë.

Zotërinj kolegë. Është e rëndësishme të theksoj se në Ministrinë e Mbrojtjes dhe Shtabin e Përgjithshëm të Forcave të Armatosura është mjaft shqetësuese edhe situate post-Gërdec. Deri tani që po flasim, pra pas gati 3 muaj nga koha kur ndodhi tragjedia në strukturat e kësaj ministrie nuk është zhvilluar asnjë analizë. Këto struktura janë në amulli të plotë dhe në mënyrë të çuditshme megjithëse janë pjesë e një dikasteri, duket se po vijojnë ekzistencë duale dhe të ndara si në dy formacione të kundërta lufte administrative dhe institucionale.

E kam thënë edhe herë tjetër se si anëtar i komisionit parlamentar për sigurimin kombëtar dhe pjesëtar i një formacioni politik që i do dhe i mbështet reformat në interes të Shqipërisë kam përkrahur iniciativat e ardhura në Kuvend nga MM, por kam kundërshtuar veprimet që cënojnë rëndë Kushtetutën e vendit siç është organizimi “i ri” i Forcave të Armatosura në kundërshtim me nenin 168 pika 1 të saj. Po kështu kemi kundërshtuar me forcë ligjin që mazhoranca Juaj miratoi me ngut për eksport-importet e mbetjeve të armatimit dhe materialeve me përdorim të dyfishtë.

Edhe pas ngjarjes së rëndë që ndodhi në Gërdec, Brenda strukturave të MM dhe Shtabit të Përgjithshëm, vazhdojnë telashet e mëdha përsa u përket administrimit dhe asgjësimit të armatimeve dhe municionit.

Shqetësuese është edhe situate e personelit. Si rezultat i reformave politike që keni bërë sipas kutit dhe interesave tuaja vrastare, kemi sot një situatë alarmante, që nuk përputhet kurrsesi me standardet e NATO-s. Keni rreth 1000 kuadro ushtarakë të niveleve të ndryshme që nuk u përputhet grada me funksionin.

E pra kjo është reforma dhe standardet tuaja në FA, të cilat u bënë të njohura për shkak të fatkeqësisë së rëndë që mori jetën e 26 qytetarëve të pafajshëm dhe plagosi rreth 300 të tjerë atje në Gërdec…

Ushtria e çdo vendi demokratik mbështetet përveç të tjerash mbi tre shtylla kryesore: - Organizimi strukturor.

• Administrimi i kapaciteteve luftarake, plotësim të misionit, teknik, armatim, etj.
• Administrim të kapaciteteve njerëzore.

Të tri këta faktorë për ushtrinë tonë ku nuk reflektohet asnjë lidhje midis eprorit dhe vartësit, përveçse kush e kush ta shesë më parë tjetrin dhe ju po e ktheni në një anarshi konsistojnë:

1. Në organizim strukturor të FA në kundërshtim me Kushtetutën
2. Në keqadministrim të kapaciteteve luftarake, deri në vrasje njerëzish të pafajshëm.
3. Në keqadministrim të burimeve njerëzore, deri në shpërfytyrim.
4. Nga kjo foltore po i drejtohem Komandantit të Përgjithshëm, zotit Bamir Topi dhe Kryeministrit të vendit, zotit Sali Berisha, boll më me demagogji dhe propagandë. Ngrihuni në nivelin  e nevojës për të kryer detyrën kushtetuese ndaj Forcave të Armatosura dhe merrni në dorë situatën në MM dhe në Shtabin e Përgjithshëm, që të mos prodhoni për shqiptarët Gërdec të tjerë. Kjo realizohet pasi të zhvillohen analizat e thella në të gjitha strukturat dhe të mos i lini kuadrot ushtarak të nëpërkëmben nga politikane të papërgjegjshëm, siç ka ndodhur deri tani. Pasi mbizotëron mendimi që me parë si Saliu dhe Mediu nuk mund të funksionojnë normalisht F.A.