Rusia paralajmëron Gjeorgjinë dhe Ukrainën

Rusia ka paralajmëruar si Gjeorgjinë dhe Ukrainën kundër anëtarësimit në NATO.

Vërejtjet pasojnë takimet e mbajtura në Shën Pjetërbug midis presidentit Medvedev dhe homologëve të tij nga të dy vendet. Siç njofton korrespondenti i BBC, James Rodgers, Rusia nuk mund të pranojë gjë tjetër, përveç faktit se zgjerimi i NATO-s është kërcënim për sigurinë e saj. Mund të ketë pasur një farë ndryshimi të stilit të administratës së re presidenciale, por jo të substancës. Ministri i jashtëm rus, Sergei Lavrov tha se takimi midis presidentit Medvedev dhe homologut të tij gjeorgjian, Mikheil Saakashvili, kishte qenë i qetë dhe jo konfrontues, por ai paralajmëroi se konfliktet në rajonet gjeorgjiane të Abkhazisë dhe Oshetisë së Jugut nuk mund të zgjidhen nga ajo që ai cilësoi "lëvizje artificiale të Gjeorgjisë në NATO. 

Çmime më të larta të gazit për Ukrainën

Ministri i jashtëm rus, Sergei Lavrov, thotë se firma energjetike, Gazprom do të dyfishojë çmimin e gazit për Ukrainën nga fillimi i vitit tjetër. Mosmarrëveshjet e çmimeve midis dy ish republikave sovjetike bënë që Rusia të ndalojë përkohësisht furnizimet në 2006 dhe do të ulë dërgesat për këtë vit. Duke folur para gazetarëve në samitin në Shën Pjetërburg, zoti Lavrov gjithashtu tha se presidenti Dimitri Medvedev, kishte paralajmëruar homologun ukrainas, Viktor Yushchenko, se nëse Ukraina anëtarësohej në NATO, kjo do të shkelte marrëveshjen e miqësisë midis dy vendeve.